|
|
HISTORIE VAN SLIEN (Historie van Sleen in het Nederlands)
Prehistorie:
Sporen van vrogge bewoning komt oet de tied umdebij 4500 jaor leen. Het giet dan um twie hunebedden noordelijk van de Zweeloërstraot an de Hunebedweg in Noord-Slien en het hunebed “De Papeloze Kerk” an de weg van Noord-Slien naor Schoonerd, körtbij het recreatiepark “Rij maar an”.Wieder bint der bodemvondsten oet de Galgenbarg, vak 58 in de boswachterij Slienerzaand, oet under andern grafvelden in het Kruidhaarsveld, ten zuden van de weg van Slien naor De Klencke en oet aandere plaotsen in de veurmaolige gemiente Slien.
Ok bint der sporen van bewoning oet de oldere Romeinse Keizertied, vunden bij Den Hool, Slien en Diphoorn.
Veurdat der gemientes waren:
Doe der nog gien gemientes waren, was Drenthe verdield in zes dingspillen. Slien was doedertied de heufdplaots van het 1e dingspil Suydevelt (Zuidenveld). Bij het dingspil Suydevelt, een rechtsgebied, heurden de kerspels Emmen, Oring, Roswinkel, Schonbek, Daolen, Hesseln, Zweel en Slien. Een kerspel was een kerkdarp, een kerkelijke gemiente, dat van oorsprong niet allén een kerkelijke organisatie was. Het was ok een burgerlijke ienheid, die schultambten nuumd weur. In 1518 was Slien een zölfstandige schultambt. Een schulte kuj zu’n beetie zien as de burgemeester en notaris in ien persoon.In Slien kenden wij ok de functie van bannerschulte. De schulte van Slien was bannerschulte van het dingspil Zuidenveld.
De vörming van gemientes:
Op 6 jannewaori 1811 kwam keizer Napoleon van Frankriek met een decreet, die ok veur Drenthe gevolgen har: Drenthe weur verdield in “communes”. In elke commune mus een maire (burgemeester) benuumd worden. In het Rapport van Zuylen van 25 febrewaori 1811 weurden 29 gemientes nuumd. Slien weur doe tot de gemiente Zweel rekend. In het Keuninklijk Besluut van 14 november 1815 wordt alle gemientes op de riege zet en daor kow Slien tegen as zölfstandige gemiente. De grenzen weurden bepaold deur de markegrenzen.Bij Keuninklijk Besluut van 7 oktober 1818 weur het Reglement van bestuur veur het Platteland van de previncie Drenthe vaststeld en die göldt veur de gemientes die in 1815 vörmd waren. De gemiente mus bestuurd worden deur een schout (benuumd deur de keuning) en een college (bestaonde oet veer leden en de schout as veurzitter), dat de naam gemienteraod kreeg. De eerste gemienteraod van Slien bestun oet schout Johannes Boelken en de raodsleden Jan Hamming ten Rodengate, Rudolf Abbinge, Hendrik Campinge en Lukas Dening. As zölfstandige gemiente begunde Slien feilijk op dinsdag 13 juli 1819. Op die daotum namelijk weurden de nei benuumde schouten op het Bureau van het Provinciaal Gouvernement verwacht um in eed neumen te worden. Daornao kunden ze begunnen in heur functie.
Het gemientewapen van Slien:
Bij Keuninklijk Besluut van 22 oktober 1928, nummer 22, hef keuningin Wilhelmina an de gemiente Slien een wapen toekend, waorvan de umschrieving zo is: “Op het schild in azuur, drie aanziende zilveren ramskoppen die de schapenhouderij in Sleen, Diphoorn en Erm symboliseren; het schild gedekt met een gouden kroon van drie bladeren en twee paarlen en gehouden door twee wilden, omkranst en omgord met loof; in de vrije hand een knots over de schouder houdende, alles van natuurlijke kleur.”
Het wapen is ontwörpen deur mr. G.A. Bontekoe, die van 1927 tot 1938 burgemeester van de gemiente Slien was.
Hoesvesting gemientebestuur en administratie:
In 1848 weur een gemientekamer huurd; de gemiente har toen 1291 inwoners. In 1890 weur de schoel körtbij de Ned. Herv. Kerk verbouwd tot gemientehoes. Van 1890 tot 1938 zul dize veurmaolige schoel dienst doen as gemientehoes. Op 3 oktober 1938 weur een nei gemientehoes an De Brink in Slien lös daon deur de Commissaris van de Keuningin, mr. dr. R.H. Baron De Vos van Steenwijk. Dizze neie hoesvesting is bouwd in neo-klassieke stijl naor een ontwarp van architect B.N.A., A.Baart in Leeuwarden. In 1979 weur het gemientehoes oetbreid naor een ontwarp van het architectenbero Wieringa & Dijkstra in Emmen. Op 9 mei 1980 weur dizze oetbreiding officieel in gebroek neumen. Tot an de gemientelijke herindieling in 1998 hef het gemientehoes dienst daon as bestuurscentrum en sikketarie. In september 2005 is het veurmaolige gemientehoes nao een grondige verbouwing in gebroek neumen as multifunctioneel centrum “De Brink”, waor de bevolking van Slien en umgeving gebroek van maken kan.
Gemientelijke herindieling:
Met ingang van 1998 is de gemiente Coevern der kommen, die bestiet oet de olde gemientes Slien, Zweel, Hesseln, Daolen en Coevern. De gemiente Coevern hef umdebij 36.000 inwoners op 30.000 bunder laand.
Bronnen:
“Het boek Sleen in verleden en heden” - oetgave van de gemiente Slien; schreven deur Gerrit Kuipers.
Slien, 3 meert 2007, W. Dijkstra.
|
bekijk volledige agenda
|
RSS