Gemienteraod

“Waor stemt wij op bij de gemienteraodsverkiezings” vruug Geert kös, terwiel e achter de computer allerlei portretten teveurschien toverde van kandidaten. Ja, daor vraog ij mij wat. Waor moew toch ies weer op stemmen?

“Dat lig er an waj wilt dat de raod veur mekaar kreg” opperde ik. “Lees ies wat ze almaol in’t zin hebt” De leesbril kwam er bij op en daornao bleef ’t een hiele zet stil. Zo non en dan klunk er hoongelach, of “Ja, dat zal wal”.  En as ik dan vruug wat of er was, dan zee e: “Mooiproters bint ’t. Er bint er bij die met heur buurt en met Jan en alleman in de clinch ligt, maar wal het beste veur hebt met de gemiente en zien bewoners, aj heur geleuven mucht. Dat vin ik niet arg geleufweerdig.  Mensen die zuch nooit met het verienigingsleven in heur darp bemuit, en die nog nooit wat in het belang van de gemienschap daon hebt, wat hebt die nou in de gemienteraod te zuken?”Daor kun ik hum gien ongeliek in geven.

Ik haar ’t ies even veur mijzölf op een briefie schreven wat ik vin dat er bij oes in Slien gebeuren möt, en waor de gemienteraod wat an doen kan:

-Er möt bouwd worden, zodat jonge Slieners hier kunt blieven wonen.

-En zie moet zuch niet laoten ringeloren deur figuren die alles tegenholden wilt vanwege te veul stikstof. ( Ik heurde van Gerrit Hidding, de mulder, dat een baol stikstof meer dan veer maol zo duur is as veurig jaor um dis tied. Dus zoveul stikstof zal er niet vermot worden van’t jaor)

-Het mfc möt goed kunnen bestaon, de brandweer ok, ……en het zul mooi wezen dat er ien schoel in Slien kwam nou de kerken ok al samen gaon bint. Maar veul meer kun ik zo gauw niet bedenken.

“As ik baos was, dan wus ik ’t wal” tunterde Geert, doe e nao een uur geargerd bij de computer vortluup. “Zie belooft maar vanalles, maar er komp vaak niks van terecht. Zie roept almaol dat de recreatie stimuleerd worden möt. Maar aj dat wilt, dan moej ’t hier ok aantrekkelijker maken veur toeristen. En dus ok veur oes. As ik baos was, dan wuur die aole haven, veur in de Jongbloedvaort, weer oetgraven en in ere hersteld. Of nog een beetie groter zölfs, daj er ok in zwemmen kunt bij de zommerdag. En vissen. Da’s mooi veur de campinggasten van Pieterom en as die er niet bint, ok veur oes Slieners. Want in ’t knaol kan de visser gien bien trekken, zoveul bomen en stroeken staot er langs. En dat zul dan weer wat goedmaken van het achterstallige gruun-underhold langs het knaol.”

Ik zegge tegen hum: “Maar daor wolden jij zölf toch ies met an? Dat hej in ’t verleden vaak roepen. Maar daor is ok nog niks van terecht kommen. Wat dat angiet liek ij ok wal wat op een politicus. Daj je nog niet kandideerd hebt man um in de raod te kommen”. Dat vuul niet hielmaol in goeie eerde. Ik zag dat hielemaol verkeerd en het lag overal an, behalve an hum vanzölf.  Toen wus ik ’t zeker: Wij moet zien daw mien Geert een aander maol in de gemienteraod kriegt! Niet dan?  Ik stem veur!                                         

Groeten, Henderkien.