Wolven

Zie hadden heur oet de koppel dreven naor de hoek van het weiland, anderhalve kilometer van Slien, waor ze, vanwege de ofrastering, niet wieder kun. Daor hadden ze heur bij de neus en de lippen en de hals grepen en heur tegen de grond warkt. Toen waren ze bij het lekkerste diel begunnen te vreten: Daor waor de bil in de rug overgiet. Al gauw waren ze bij de darms, die ze hen boeten trökken. De pink die het undergung brulde het oet deur de helse pien en de angst die ze deurmaken mus. Toen de rovers zat waren en ofdreupen, hadden zie een gat van roem een halve meter deursnee oet de pink vreten, die oeteindelijk nao uren, deur de dood van zien pien en angst verlöst wuur.

Je kunt je de onmacht, en het verdriet en de woede van Albert - en Gerben Eising, de eigenaren van de pinken, veurstellen toen die de volgende mörgen bij heur laand kwamen en zagen wat er was gebeurd. Mannen die 24 uur, zeuven dagen in de week gangs bint met verzörgen en het koesteren van heur dieren, en dan confronteerd wordt met een verscheurd dier dat zie met zörg optrökken hebt.

Maar dat begrip is er niet bij elk en ien. Wat mij zo gruwelijk hellig mak is de holding van het cluppie mensen die het natuurbeleid in Nederland bepaolt. De vrouwelijke boswachter die zunder blikken of blozen vertelt dat wij er maar an wennen moet dat er hier wolven bint. “Want die heurt non ienmaol in de natuur thoes. En waor zeurt die boeren over? De schade wordt immers vergoed?” Het licht giet je toch oet aj dat heurt?

Ja, inderdaod. De wolf heurt in de natuur. Daor is e de top van de voedselpiramide. De regulator van het aantal grote hoefdieren. Maar men kan toch niet met dreuge ogen beweren dat het Drentsche plattelaand natuur is? Het is een agrarisch gebied en dat is al veule honderden jaoren zo. Daor kuj niet zo-in-iens de normen van de wilde natuur op lös laoten.  Er is hier niks natuurlijk veur de prooidieren van de wolf. De boerderijdieren bint er niet op fokt um lange achtervolgings deur een roedel wolven te kunnen doen. Het gebied zit vol ofrasterings, sloten, autowegen en knaolen, körtum, wolven brengt hier allèn maar veul ellende. En hebt wij ze dan neudig um oeze reeën te beheren? Het is al lang mooi dat die zuch hebt weten an te passen an de agrarische umgeving in een laand vol mensen.  Ok die dieren kunt niet op een natuurlijke manier vluchten veur de wolf, ok die loopt tegen knaolen, wegen en ofrasterings op. En as het an de natuurbescharmers lig, tegen nog veul meer hoge hekken. Niks gien natuurlijke selectie deur de wolf. Wal veul onrust en stress. De mens hef al decennia lang bewezen dat e prima in staot is het reeënbestand op een verantwoorde wieze te beheren as dat neudig is.

Het liekt wal asof de beleidsmakers bevangen bint deur wat de Engelsen “wishful thinking” nuumt. Wensdenken. Zie wilt geern dat Nederland weer een stuk oernatuur wordt. En nou bint er wolven, en zie: nou is ’t klaor. De natuur is hersteld. Vanoet de zölfde gedachte is toendertied de ‘nieuwe natuur” rondum de Oostvaardersplassen inricht, met alle fatale gevolgen veur de peerde, rundern en herten die er in opsleuten wuren en oeteindelijk met veule honderden crepeerd bint. Maar de “vroege vogels” van Nederland rupen met oogkleppen op dat de natuur het allemaol prima zölf kun regelen. Nou, dat hew zien.

Maar is dat wat wij wilt met mekaar in Drenthe? Moet um alle weilanden hoge hekken bouwd worden umdat een klein groepie mensen het zo fijn vindt dat er weer wolven bint? Wilt wij echt dat wij geen reeën meer ziet in de natuur? Geeft wij er niks um dat er geregeld koenen, schaop, veulens en pony’s verscheurd in de wei ligt? Moet wij daor maar an wennen ? Wij leeft toch in een democratisch land? Zuw ies een stemming under alle Drenthen holden hoe men daor over denkt?  

Geert en ik vindt dat koenen, peerde en schaop hier gewoon veilig in de wei moet kunnen lopen en wij wilt ok geern reeën zien as wij deur ’t veld fiets. Is dat dan zun rare gedachte?  Laot ze alstjeblieft zo gauw meugelijk die wolven opvangen en hen Siberië brengen en as dat niet wil, dan schiet ze maar of. Kom nou toch. Wij zet toch ok gien broene beren oet in de randstad um daor het probleem van de menselijke overbevolking op een natuurlijke manier op te lössen? Virussen en bacteriën bint ok natuurlijk, maar die wordt toch ok bestreden? En rötten…

Men kan het de wolf niet kwaolijk nimmen dat e landbouwdieren opvret. Zul ik ok doen as ik hum was. Wij haalt oes eten ok bij de Albert Heijn. Maar ik wol de beleidsmakers wiezer hebben. Er is gien enkele reden um dat dier hier te bescharmen. Wal in echte natuurgebieden zo as die er in Noord- en oost-Europa nog bint.

Remkes haar het over de kloof tussen de stad en het platteland. Dit is er een goed veurbield van hoe die ontstiet.

Ik denk dat wij as plattelanders veul meer tegengas geven moet richting de Natuurorganisaties. Wij bint gek op de natuur die er in Drenthe is, maar er bint wal grenzen. En wij bint er hier met oes boerenverstaand prima toe in staot um die zölf an te geven, dacht ik.

Zo. Dat mus mij even van ’t hart.

Een hellige Henderkien