Laot maar knappen!

Wij waren vandeweek wat an ’t hemmeln rondum hoes. Het was mooi weer, en as de zun dan eindelijk ies weer schient, dan moej hen boeten. Wij wal, in elk geval. 

Geert luup met de riesbezzum de oprit an te vegen. Doe e het bultie rommel bij mekaar pakde op de schup, lagen er ok nog wat vuurwarkrestanten bij. De leste getugen van prachtig siervuurwark tiedens de jaorwisseling. Wij hebt er met oes twiebeiden geweldig van geneuten. En dat het waarschienlijk veural illegaal siervuurwark was, daor hebt wij oes niet zo drok um maakt.

Dat doet wij wal as het giet um extreem zwaor knalvuurwark, zoas die Cobra’s.

Dat bint net bommen en zo wordt ze zo non en dan ok gebroekt. Daor moet ze met opholden. Levensgevaorlijk, veural umdat ze gebruukt wordt deur jongeren, in een groep, die vaak ok nog ies flink under de eulie bint.

Ik moet zeggen dat zulk vuurwark in Slien dunkt mij niet veul gebruukt is. Aj hier gek bint op zwaore knallen, dan kuj je hart ophalen bij de jongs van B.S.K., bij de familie Groothoes achter de boerderij. Daor stun een riege carbidmelkbussen opsteld, met voetballen as ofsluters, die zo non en dan zo hard knapten, dat je ’t trilde tot in het börstbien.  De voetballen vleugen gloepens hoog de lucht in, de jongs hadden geheurbescharming op, er braandde een lekker vuurtie in een tun, er was een tent met gezellige muziek en der wuur een glassie bier tapt. En gezellig dat ’t er was! Ik kreeg mien  Geert zowat niet meer met hen hoes.

Het was niet de eerste keer dat dizze groep dit organiseerde op aoldjaorsdag. Het begunt al een beetien een traditie te worden, want het was er glad drok tegen ’t ende van de middag. De tent stun stiefvol volk, jong en old deur mekaar, en elk was bliede. Men kun een spontane bijdrage in een melkbus gooien die op de bar stun en ik weet vast dat de jongs er niet bij inscheuten bint. Is het niet geweldig dat dat hier nog kan?

Het leek wal wat op de sfeer die er was tiedens het carpoolfeest, dat die zaoterdagaovend daorveur holden wuur in een feesttent op de carpoolplek bij Erm. Dat was ok ien vrolijke, feestende massa mèensen, veural jongern, maar ok wal vieftig plussers. Dat het optreden van Harm en Roelof, die beide de zestig al passeerd bint, veural bij de jeugd geweldig ansluug, vunden wij wal hiel verrassend. En ok hier waren het jongern die het organiseerd hadden.

Bijkommend veurdiel is ok dat er op aoljaorsaovend niet meer sleept wordt. Tegen elf uur ’s aovonds hebt de potentiele slepers de piepen mooi vol. Dat scheelt oes een bult geheister met tuunbanken en bloempotten en zulkswat.

Er wordt vaak ofgeven op “De jeugd”. En, eerlijk is eerlijk, as er gedoe is, dan bint het ok vaak jonge jongs die dat um hands hebt. Oeze Burgemister Renze Bergsma huul dat terecht an tiedens zien neijaorstoespraak, waorin e de trammelant die der in Coevern west was, hekelde. Maar die haar in zien achtertuun zien hoe ’t ok kan.

Laot die Coeverder jongs een veurbield nimmen an hoe het er in Slien, Erm en Diphoorn an toegiet rond old en nei. Wat oes betreft kreg oeze jeugd een hiele dikke pluum! Het gef in elk geval vertrouwen veur de toekomst!

Gelukkig neijaor allemaol!

Groeten, Henderkien