Zie zegt…..

Zun grote Albert Heinwinkel hier bij oes in Slien is barre plezerig veur aj wat dan ok maar hebben moet; ej komt er zelden vergees.  Maar umdaj smangs wal een half uur rondzwarft veurdaj vunden hebt waj zuukt, ontkoj er niet an daj kundigheid tegen’t lief loopt. En daor koj dan vanzölfs even met an de proot hè.

Zie zegt dat Gerriet Hidding de meul slopen wil. Ja non, ik weet’t ok niet, maar d’r wuur zegd dat hum die meul wal tiendoezend euro in’t jaor kost an underhold en zulkswat, en dat ‘e dat er niet meer veur over hef non zie hum zo inbouwd hebt met de neie “Schoel”. Hie wil ’t liefst waorens an de rand van’t darp een neie zaak henzetten, maar dat kreg ‘e bij de gemiente niet klaor.  Zie zegt ok wal dat de kans dat Gerriet op dizze manier zölf sloopt wordt groter is dan dat de meul tegen de vlakte giet. 

Zie zegt ok dat Geertje Heegen, tegenover de bakker, heur hoes verkoft hef an de gemiente. Maar d’r wordt ok beweerd dat ‘t nog niet zo wied is. Nou, ik kan mij’t aans wal veurstellen dat Geertje d’r gien aordigheid meer an hef um daor te wonen.  D’r is tegenwoordig ok jao niks gien byzunders meer op tillevisie, en wat moet die luu in dat appartementengebouw dan aans doen als aal wat deur’t glas hen boeten loeren. Um te zien hoe Geertje an’t Hemmelen is in heur mooie bloementuun of wat veur kopdoek zie vandaag um hef.  Nee, dan wus ik’t ok wal. Nou, zie zegt, het möt nogal hiel wat opbrengen.  De gemiente kreg’t niet zunder slag of steut in handen.  Maar wat zullen ej doen in zun geval ?

En zie zegt ok dat’t woonwagenkampie hier vot giet . En zie zeden dat daor dan de meul kwam te staon, mooi op’t westen, vrij op de wind. En de sporthal kwam dan waor non de manége is, en die zul op zien beurt dan kommen vlak bij de neie plek van de meul, zodat het peerdevoor mooi binnen handbereik an te leveren is.

Waj al niet gewaar wordt in een half uurtien tied, opzuuk naor erpelschelmessies bij Körtwiek in de winkel…

Henderkien