Brummels zuken.
Ik zeg vanweek tegen Geert: Wij kunt wal ies hen brummels zuken gaon. Langs de Jongbloedvaort, daor bint er dunkt mij zat van’t jaor. Veur vittien dagen zöchten de toeristen ze almaol op, maar ’t is er non weer een stuk rustiger. De brummels bint weer veur oes. Net als de Kibbelkoel. Daor hebt Geert en ikke zundagnaomiddag nog een zettien in de zun zeten, Geert met de boksepiepen opkruld. Aans wil ‘e dat nooit, middel maank aal dat volk, maar non was’t er heerlijk rustig. Huufde gien mèens zuch an zien dikke spatao’ren te steuren.Wij hebt gister wal drie uur bij de jongbloedvaort umscharreld, en wij bint gien mèens tegenkommen. Heerlijk. En wij hadden een emmer vol brummels. Tien potties jam he’k er van maakt ! En d’r is gien lekkerder jam dan brummeljam.
Kiek, dat vin ik nou zo mooi van oes darp. Daj hier in dizze moderne tied ok nog wat voedsel oet de vrije natuur halen kunt. Dat huuj rond die grote plaotsen niet meer te proberen.
Men heurt wal ies mensen voeteren, als dat er hier zo weinig te beleven valt, en dat’t in Daolen en in Zweel altiedeng veul drokker is en zo. En dat daor alles kan, en hier zowat niks.
Ach ja, het is maar net waj wilt. Hier kuj nog hen brummels zuken. Dat huuj rond de huttenheugte niet te proberen.
Hier kuj nog eekhoorntiesbrood plukken, vlak an’t darp. Lekker met een biefstukkien en een gebakken siepeltien. Dat huuj rond het Aelderholt ok niet te proberen.
Slien is veur hiel veul zaken eigenlijk net even te klein. Daorum staot er nog aal appartementen en winkels leeg midden in’t darp.
Maar als ik hiel eerlijk bin huuf’t um mij nooit groter te worden.
Mien Geert denkt daor nao gister wat aans over, maar dat komp umdat ‘e
langoet in de brummelkribbels vallen is. Hie zit under de schrammen.
Ik zal hum vanaovond ies een extra lepel brummeljam deur de yoghurt doen. Daor knapt ‘e vast van op.
Groeten van Henderkien.