Ruumte

Wij lupen vanweek over’t tegelpad langs de tennisbaan op’t knaol an. Wat is’t daor weer roem worden non Bert Scholte en Roelfie Hoekman en consorten de singel langs de gruunkampen van de manege mooi opsnuid hebt. Mien Geert vun’t host wat te kaal, maar ik hol er wal van. Non kuj vanof ’t knaol het darp mooi zien liggen. En men kan ok veul mooier hen boven kieken, naor de wiedse blauwe lucht. En wat was dat mooi vanweek. Er was gien vliegtuugstreep te zien. Toch mooi daw ok nog ies wat kriegt van Iesland. Wij kregen een beetien het “autoloze zundag gevuul”, maar dan veur vliegtugen. Zo möt de lucht er hiel vrogger ok oetzien hebben.

Maar wat lig daor nog een lap grond niet, daor bij die manege. Non kuj’t mooi zien. Zul dat nog wal deurgaon dat daor hoezen op bouwd wordt, vrugen wij oes of ? Zie zegt dat er weer aal minder volk komp, in plaots van aal meer. Zie kriegt de Delftlanden ok al niet vol. Non vraog ik mij ok of wat oj daor zuken moet daor op de zandzoom. Dan zat ik dunkt mij aorig liever hier in Slien of op Diphoorn. Ja, gao maar nao: Wij hebt hier een knoepert van een Albert Heijn, een hiele warme bakker, wij hebt de meul waor zaod en pootgoed te koop is, wij hebt Lambert Albering, ej kunt hier zölfs pizza’s en kebab en zulkswat kriegen en drie maol in de week vis, dat, wij doet zachiesan niet meer veur Emmen under. En dat almaol zunder stoplichten en parkeermeters.

Ik vin: Slien is groot zat. Als er toch aal minder volk komp, knap dan bestaonde wonings mooi op. Gooi hier en daor in een lillijke woonwiek een paar hoezen plat, zodat er meer ruumte veur tuunties enzo komp, en laot die manege daor maar mooi staon. Dan kunt zie de rommel er umhen ok ies schier maken en dan zuj ies zien hoe mooi’t hier wordt. Kuw ze daor in de Delftlanden fijn de ogen oetsteken met mekaar.

Doe wij vanof’t knaol weerum over’t zölfde tegelpad lupen, gung Geert per ongeluk midden in een grote hondekeutel staon. “Zie muzzen een wandelpad an de manegekaant langs die singel maken”, voeterde ‘e. “Dan kunt die honden mooi in de bos schieten. Gruit ’t ok gauwer weer an”. Was dunkt mij nog niet zun gek idee…….

Groeten, Henderkien.