Het leukste darp

Kiek ij ok wal ies naor “Het leukste darp“? Dat programma van RTV-Drenthe?
Ik mag’t wal geern even zien, maar mien Geert möt er niks van hebben. Die wordt aal franteriger as e der naor kek. “Wat zeg mij dat non, het leukste darp van Drenthe”, mostert e dan. “Elk vindt zien iegen darp toch het mooist? En het woord “leuk” is ok hielmaol niet Drèents. Wat zeg mij nou “leuk”. Een jurkien of’n bloesie is leuk, of’n klein wichtien op’n driewieler. Maar een darp toch niet? En wel dommee de mieste stemmen kreg, dat zul dan ’t leukste darp van Drenthe wezen? Wát’n verstaand. Dan zuj as Diphoorndiger, of Noord-Sliener jao nooit verkeuzen worden, terwiel dat misschien wal veul “leukere” darpen bint dan Westerbörk of Rune, of weet ik veul wat veur grote plaots”. Ach, en zo tuntert Geert dan wat an, maar hie blef intied wal mooi zitten te kieken totdat’t programma oflopen is.

Ik heb wal al begrepen dat ’t hiel belangriek is dat er een stark gevuul van saamheurigheid is um goed te scoren bij dit programma. Slien döt niet met. Maar ik vruug mij of, hoe “leuk” is Slien eigenliek? En hoe zul’t hier met de saamheurigheid gesteld wezen as’t er op an komp?
Er bint dunkt mij wal veul veurbielden waoroet men kan opmaken dat er in Slien veul saamheurigheid is. Er bint veul verienigings op allerlei gebied, de kerken hebt gelukkig de koppen bij mekaar steuken, de schoelen doet dat hopelijk ok nog ies, de meul wordt mooi opknapt, van’t zommer is er weer spelweek., en zo kuj nog wal even deurgaon. Maar wát as’t er echt op ankomp?

Stel je veur, dat deur de bezunigings, de gemiente de subsidie veur’t in stand holden van het MFC an de Brink intrekt en al het wark deur vrijwilligers möt gebeuren. In hiel veul darpen is dat al zo. Een nicht van oes woont in Nuis, in’t Grunningse westerkwartier. Daor hebt zie een ploeg van meer as honderd man vrijwilligers die’t darpshoes dreiende holdt. Ien maol in’t jaor kreg die ploeg een feestaovond anbeuden, en dat is de ienige beloning die zie kriegt.
Dan vraog ik mij wal ies of, zuj hier in Slien ok zun ploeg bij mekaar kriegen?
Bint hier ok wal zoveul mensen die daor een diel van heur vrije tied veur over hebt? Ik mag’t hopen.
Zul wal hiel leuk wezen!

Henderkien