Kampie

Heb ij wal ies een nacht op een boot slaopen? Op zun handig motorjachtien, zoas die ok wal deur de Hoogeveense vaort vaart ? Mien zwaoger en schoonzuster hebt zun ding. ’s Winters lig e in Eernewoude, en um dis tied trekt zie er met rond, veural in Friesland en Overiessel. Maar non hebt zie vandeweek een tocht maakt deur’t Grunnigerlaand, en dan via dat neie knaol bij Erica Drenthe in. Geert en ik hebt een paar dagen metvaren en wij hebt in de buurt van Giethoorn ok een nacht in dat ding deurbracht.
Geert zag er as een barg tegenop. Hie was bang dat e der aal of mus um te pissen, vanwege het klotsen van de golven tegen de boot. Maar het is oes beide geweldig metvallen. Wij hebt er zó van geneuten. Er giet een geweldige rust van oet. ’s Aovonds lagen wij an een steigertien, mooi an’t riet. Geert en mien zwaoger Lukas gooiden een hengeltien oet, pilsie in de haand, en Aaltje en ik een glassien rosé, de vogels fleuten, körtum, leve de rust en de vrijheid!
Toen zee ik zo dat ik mij het gevuul van vrij wezen dat schippers en woonwagenbewoners hebt, wal veurstellen kun.
En zo kwam’t gesprek op oes kampie, vlak bij de sporthal in Slien. Geert en Lukas zaten an heur daarde pilsie, en daor stun ok al een borreltien naost, en oeze eerste fles wien was ok al zowat leeg.
Geert ruup: “Wat möt een echte kamper nou met een woonwagen in Slien?
Een echte kamper wil op’t kamp in Emmen wonen, of daor vlak bij. Die möt met old iezer en zulkwat an’t knooien. Het is net ien grote familie. Zie wilt bij mekaar blieven. En as er iene niet um liek wil, dan möt die waorens aans hen.
Dan kriegt wij ze in Slien. Het oetschot zeg maar.”
Ik zeg tegen Geert: “Dat kun ij toch zomaar niet zeggen? Slien is een mooi darp. Ik kan mij veurstellen dat zie hier geern wonen wilt.”
“Ach wát”, ruup Geert, terwiel e een klein baorsie ophuul, “ Rapallie is’t wat hier henkomp. Zie steelt je de fiets bij de sporthal vort, zie hebt um de haverklap ruzie, de plietsie komp er zowat alle dagen, en dat doet ze niet veur de gezelligheid. Ij zult er maar vlak achter wonen. Dan bi’j der mooi klaor met. Zie bint niet veur niks van’t grote kamp verbannen”.
“Maak je maar gien zörgen” suste Lukas.” Ik heb begrepen dat zie een staonplaots kopen moet um er te wonen. Nou, iene die dat betalen kan giet heus niet met de wagen hen Slien. Die wil op’t grote kamp blieven. En die dat niet betalen kan, nou, die komp hier ok niet.”
“Henderkien wicht,” glunderde Geert, “wij vraogt een ligplek veur een woonboot an, in de haven van de Jongbloedvaort. Liekt dei dat niet wat?” ik zeg: “Ach man, Ij kunt toch hielemaol niet meer varen deur de Jongbloedvaort?” 
“Met de wagens van die kampers kuj ok niet rieden”, miende Geert. “En as dát wal mag, waorum mugt wij dan gien woonboot hebben in ’t knaol?”
“Dan komt wij naost je liggen met oeze boot” glunderde Lukas, terwiel e nog ies inschunk. Maar of ik dáor nou wal zun zin an heb……

Henderkien