Ontwikkeling

Hej dat kös ok lezen in de kraant? Dat Emmen zun onantrekkelijke plaots zul wezen? Zie staot geleuf’k zowat underan de liest as’t giet um antrekkelijkheid, warkgelegenheid, en gao zo maar deur. En dat terwiel het marktplein zo mooi worden is, en er een geweldige dierentuun komp. Er is een tunnel die in de priezen vallen is vanwege de prachtige verlichting, en de markt zit weer op de aole plek. Ik vin Emmen er juust aal mooier op worden (op de veurmalige oldheidskamer nao). Allèn, dat möt eerst nog ies deur die randstedelijken ontdekt worden. Maar dat komp vast. Zie zit in Emmen niet bij de pakken neer, en daor moet wij in Slien ok veur oppassen.

Men kun jao niet op een verjaordag kommen of er wuur klaagt dat er bij oes in Slien host nooit wat gebeurt, dat’t hier maar een dooie boel is, en dat er in aander darpen altied veul meer bedrievigheid is.

Maar gelukkig liekt het de leste tied wat te veraanderen. Er bint tóch undernimmers die het anduurt um in Slien de nak oet te steken. Bea Körtwiek as ien van de eersten met heur prachtige supermarkt, kapster Josiene is veur heurzölf begunt, Theater De Deel wordt oetbreid, en zo bint er nog een paar veurbielden. En hoe meer van zulkse bedrieven er komt, hoe starker oes darp wordt. ”De kracht ontstiet deur de som van de diepen”, ruup Geert lest, maar dat haar e niet van zukzölf. Maar hie haar wal geliek!

Zit Geert en ik kös weer op een verjaordagsvisiete, begunt die zölfde luu die altied de mond zo vol hadden dat er hier nooit ies wat gebeurt, of te geven op de bouwerij van Erwin Weggemans zien bedriefie, op dat van Geert Elling, an de Grunnigerweg. Het zul er zo drok worden op dat prachtige rustige plekkie. En die paar boompies die er poot waren muchten daor toch veural niet staon. Want dat leek jao niks. En zo zoerproemde’t nog een zettien deur.

Ik wuur der host wat franterig van. Wat woj dan? Dat alles maar blef zo as’t altied was? Zo as’t altied was is’t hier allang niet meer.

Kiek, ik vin ok wal daw de kip met de golden eier niet slachten moet. Slien is een mooi, rustiek zaanddarp, en het huuf hier um mij gien twiede Örvelte te worden.

Maar der komp daags zo-wie-zo al een stroom toeristen langslopen. Wat zul mij dat as er een paar daor even opsteekt en daor een happie eet? Het wordt vast gien Mc-Donalds. En as die luu dat bevalt, dan wordt er over proot. Dat’t hier in Slien zo mooi is en daj hier zo lekker eten kunt. En dan komt ze nog ies weer. Dan wilt ze hier misschien wal ies kamperen, gaot ze hier bosschuppen doen, en wilt ze ok ies pruven hoe of’t eten in rest. De Deel smak, of bij De Linde. En misschien bint er wal welken die hier zölfs een hoes kopen wilt. En dan wordt die hoezen hier ok een stuk meer weerd.

As wij Slien wat levendig holden wilt, moew ’t niet laoten doodbloeden, maar moew het bedde zo non en dan ies opschudden, en hier en daor wat beddegoed vervangen. Ij slaopt toch ok niet meer in de beddestee, wal?

Groeten, Henderkien