De Zudenveldliest
Vanweek op een aovond, wij wollen net an taofel gaon, gung de bel. Ik zal de naam niet numen, maar er stun een bekende vrouw an de deur met de intiekenliest veur het Zudenveld. Nou ja, zó bekend was zie ok weer niet, aans was zie jao wal achterum kommen. Maar goed, aj achterum komt, wordt ’t al gauw een klein bezuukie. Men prat dan eerst even wat over en weer over de griep, Donald Trump en de stoepranden en zulks soort narigheden, en vervolgens wordt dan de liest veur de dag haald, waor men zuch an de keukentaofel dan ies even fijn over bugen kan um te zien hoeveul elk wal over hef veur het Zudenveldfeest. En dan is zun vrouw zo weer een kwarteer wieder, veur zie de volgende achterdeur binnen giet. En aj dan dattig adressen hebben moet, moej hiel wat aovonds op stap.
Nee, dizze vrouw bleef mooi bij de veurdeur staon. Zie gaf mij de liest, en dan gebeurt er het volgende: Men zöt een hiele riegel namen van buurtgenoten, en men zöt ok wat elk over hef veur het Zudenveld. En eigenlijk wil ik dat hielemaol niet weten, want die nog nao oes komt ziet dat ok van oes. En wat hef een aander daor met neudig? Maar oj non wilt of niet, het oog valt je er op. Daor waren welken bij die een tientie gaven, vieftien euro wuur het miest daon. Er was er iene bij die er twintig euro veur over haar. En ach, Geert en ik kunt oes goed redden, dat ik denk: kom, niet kinderachtig wezen, ik schrief ok twintig euro op. Want ik wol niet veur (ik nuum gien namen) underdoen. En het vuul mij trouwens bar tegen van (ik nuum gien naam) dat die er maar een tientie op zet haar. Altied met de snater veuran, en as puntie bij ’t paoltie komp, kan er maar zunigan een tientie of. Kiek, dat (ik nuum gien namen) maar tien euro geeft, is begriepelijk. Die mèensen hebt het niet zo bried. En dan is het knap dat zie toch nog wàt geeft. Zie hadden ok niks geven kunt. Trouwens, die vieftien euro van (ik nuum gien namen) haar ik eerlijk gezegd ok nooit dacht. Aj kiekt veur hoeveul geld of die lui an vuurwark verknapt hebt… Zéker veur honderdvieftig euro. En dan vieftien euro veur’t Zudenveld….Het gef te denken.
Kom ik vanmörgen .. (ik nuum gien naam, maar zie komp oet ’t Noord-ende) tegen bij de Albert Heijn, en die vruug mij of zie bij oes ok al lopen hadden met de liest. Nou, bij heur ok. Verleden week al. En hoes an hoes tiekende veur vieftig euro. Zie ok vanzölf. Nou ja, behalve (ik zal gien naam numen, zie dee dat wal) maarja, die woont hier ok nog niet zo lang en zie komt hier ok niet vort hè. Zodoende hadden die maar viefendartig euro tiekent. Maar toch een leuk gebaar, vun (ik nuum gien naam) Tja. Ik heb maar niks zegd.
Oeze buurtveurzitter (Dunkt mij Jans Hilbrands) haar wal geliek toen e zee daj tiedens de veurbereidings op het zudenveldfeest veul mensen ies op een andere manier leert kennen! Leuk man! Veural aj wat neischierig anlegd bint zoas ik!
Groeten, Henderkien