't Knaol

Goeiedag allemaol. Wij bint er weer heur! Gelukkig maar. Aj geern tot rust wilt kommen moej niet met een busreis hen Tirol gaon. Oh, het laand was prachtig. Die bargen en de mensen daor, geweldig. En lekker eten daj d’r kunt. Oh oh, Geert is zes kilo ankommen deur al die dikke schnitsels en die pullen bier. Ik bin dunkt mij nog wal op mien aole gewicht, want wat ik er deur’t lekkere eten bij kregen heb, dat is er an argenis wal weer ofgaon. Kiek, als men met een groep reist, dan möt men rekening met mekaar holden. Maar als wij weten hadden daw met een bus vol brokkenpiloten en körtkoppen hen Oostenriek muzzen, dan waw dunkt mij niet metgaon. Want die wol niet bij die zitten, en er waren vieve die per sé veur in de bus zitten wollen, aans gung’t op speien an, twie dames kunnen niet langer dan vief minuten lopen, dan muzzen zie eerst even zitten, ien man kwam steevast overal een kwarteer te laat, en ienmaol was ‘e verdwaald en hew er zowat een halve dag op wacht, d’r kreeg er iene hoogtevrees in de stoeltieslift en die dus niet weerum, en gao zo maar deur. Ha foi, wat hew d’r wat met beleefd. Maar wat is’t er mooi daor in die bargen. En schoon! In die darpies ok, alles keurig underholden. Een lust veur’t oog. Geert en ik hebt oes de ogen oetkeken. Maar goed, het is altied mooi um vot te gaon, maar ok um weer thoes te kommen. Geert kreg nao twie dagen al wens van zien tuun en van Slien, en van Herman zien stoet. Zulks duurt bij mij vaak wat langer.

Doe wij d’r weer waren hew eerst ies alle kraanten van de ofgelopen tien dagen deurspit. Ik muuk mij vot al hellig um een artikel waorin stun dat Drenthe de minst mooie provincie van Nederland zul wezen. Wat zint mij dat veur halve garen die dat opschrieft?! Hebt die de ogen in de buus? Of reist die allen maar over de N37 of de A28 deur Drenthe?

Wij bint maar ies fijn met oes twiebeiden een ende langs ’t knaol gaon lopen. Bij’t hoes van de joffers kregen wij’t over Aoltien Tallen die pas overleden is. En dat dat zun prachtig, markant mèens was. En dat Aoltien als wicht an een hiel aander knaol woonde dan het knaol zoals dat er non bijlig. Aoltien kun vrogger vanoet het kamerraam de Sliener toren zien. Dat kan al lang niet meer. De brug is vot want er kunt toch gien schepen meer deur. Kös hew ies proot met een man die als kind met zien volk op een erpelschip vaak hen de haven van Slien varen was. Hie kun zuch nog herinneren dat het water hier altied zo helder was. Helder is’t nog altied, dat wil zeggen, de bovenste halve meter. Daornao is’t ien grune drap van waterplanten. Veural het stuk vanof de Zwollingsdam tot an de Hoogeveense vaort. Als die drap van’t harfst ofstarft, bin ik bang dat er veul vissen dood gaot. Waorum lat het waterschap dat toch zo wied kommen ? Boeren moet heur sloten en watergangen toch ok schoon holden? En waorum wordt het aole jaagpad niet weer in ere hersteld, zoals ze dat in Odoornerveen ok daon hebt. Daor is de gemiente verantwoordelijk veur. Geert haar wal zin um dat met een man of wat veur mekaar te maken. Maarja, oj de gemiente daorin metkriegt, dat is maar zeer de vraog. Cultuurgoed moej underholden, of dat non een meul of een knaol of een landschap is. Wat dat angiet muzzen die luu van ’t waterschap en van de gemiente ok ies hen Tirol. Maar dan niet in ien bus, want dan komp er vast gedoe van.

Groeten van Henderkien